糖妹同許廷鏗前晚喺旺角出席手機活動，糖妹收到廣告商送嘅兩部手提電話，佢好苦惱話唔知用邊部先。問佢會唔會送一部畀男友Bro5成員Dominic，佢就笑住話：「我唔會同人分享，因為廣告商係送畀我。」至於許廷鏗對有傳謝安琪加入佢嘅唱片公司，踢走陳法拉同欣宜做一姐，佢話：「我又唔覺得，可能公司幫佢發行啫，咁冇乜影響。」
