【本報訊】李寧（2331）連續兩年兩發盈警，拖累「體育股五子」全線報跌，更令整個板塊昨日共蒸發約12億元市值。有外資基金經理表示，縱然李寧終面對現實關閉分店，但整體來說今年運動股依然「無運行」，起碼要到明年先好「再諗」。 記者：陳健文
該外資基金經理說：「同兩年前比，家體育股真係變咗過街老鼠，無人有興趣，仲睇緊嗰啲，都係睇有冇得博反彈，或者係等緊機會沽空……好似噚日朝早嘅投資者電話會議好鬼冷清，無乜人打入嚟。」
存貨問題非常嚴重
另外一名外資分析員亦表示，越來越少投資者打電話來問體育股情況，打來的都只是問何時可以沽空。他說：「你可以話李寧以至整個板塊，已喺今年首季觸底，但由於存貨問題仍非常嚴重，今年最多只會表現平穩，唔再大幅倒退已經偷笑。」
他亦指李寧周一晚「漏夜」刊發的盈警，唯一安慰是終面對現實。他說：「佢哋終於肯調整店舖佈局，唔再盲目開分店。」截至去年12月底止，李寧有8255家分店，並表示會繼續開新分店。
李寧日前同時宣佈，擊敗安踏（2020）取得中國男子籃球職業聯賽（CBA）共五個賽季的贊助權，惟沒有披露贊助金額。
有投資者於昨日的電話會議上亦有就相關支出作查詢，但公司管理層拒絕透露。
美林降目標價47%
有分析員說：「之前有傳過5年要使成20億，但噚日佢哋無評論個數啱唔啱……李寧攞返個CBA唔係唔好，但假設一年要使4億，平時佢哋一年嘅宣傳費用都係大約10億咋，你話成本壓力大唔大？相對其他品牌李寧唔係特別多錢，家爭返個贊助權返嚟，好有孤注一擲嘅感覺。」
就失落了CBA贊助權，安踏體育發言人表示，集團對各項贊助資源的重點考慮，是能否為品牌帶來宣傳效益。
美林即時將李寧評級下調至「跑輸大市」，目標價下調47%至4.7元，反映預期公司需更長時間恢復元氣。德銀則維持「持有」，目標價7.5元，正檢討是否需作調整。李寧昨最多跌逾8.58%，收報5.25元，跌8.06%或0.46元，創六年半新低。
被搶去CBA贊助權的安踏，昨亦跌3.33%或0.2元，收報5.81元。