歐國盃求驗客:格連莊臣去咗邊? - 求驗客

歐國盃求驗客:格連莊臣去咗邊? - 求驗客

我求大俠細個嗰陣有睇過《Where'sWally?》呢本兒童圖書,係講要喺茫茫人海之中搵番Wally出嚟;前晚英格蘭對法國場歐國盃D組分組賽,賽前影團體相嘅時候,就突然唔見咗格連莊臣,搞到三獅兵團張相得番10個人。究竟格連莊臣去咗邊呢?
前晚場英法大戰,喺賽前唱國歌嘅時候,我求大俠明明見到格連莊臣,但唔知點解影團體相嗰陣,佢就唔見咗人。於是有人講笑咁話,可能係呢位右閘中咗英軍嘅受傷魔咒(魯迪、巴利、林柏特同加利卡希爾先後因傷退隊,連龍門教練基文斯前日亦整傷腳踭,要返英國做手術),搞到佢未開波就傷出;亦有口痕友話,係佢唔記得搽防曬霜,嗱嗱臨走返入更衣室補補佢。有個講法仲搞笑,係話佢人有三急,所以要喺唱完國歌後一支箭咁標去廁所。

英格蘭右閘格連莊臣(紅圈示)唱歌時仲喺度,轉頭影團體相(右圖)就唔見咗人,究竟佢去咗邊呢?GettyImages/法新社

「一開波就10個打11個」

但據現場人士表示,其實格連莊臣係大頭蝦得滯,喺唱完國歌後唔記得要影團體相,一轉身就跑去佢負責嘅後防右路位置;到佢發現咗嘅時候,經已太遲,事關啲隊友已經影完相。就係因為呢位利物浦球員老人痴呆,結果搞到英格蘭喺今屆歐國盃第一張相就唔齊人,仲令英軍畀網民笑一開波就10個打11個。好彩,英格蘭最終同法國打成1:1,如果唔係,英國啲小報肯定借題發揮,搵佢嚟祭旗。
格連莊臣份人咁失暈,我求大俠勸佢喺英格蘭大軍營地嘅遊戲室,千祈咪同隊友玩掟飛鏢,費事整親人啦。話時話,英軍個遊戲室仲有乒乓波同桌球玩,其中阿仙奴孖寶禾確特同埋阿歷士張伯倫嘅乒乓波技術仲唔錯㗎,睇嚟有潛質由國腳轉做國手!

同效利物浦嘅佐敦軒達臣(左)、安祖卡路爾(右)喺遊戲室玩掟飛鏢。互聯網