港劇中的全職爸爸，通常不出兩款：一，妻子早逝的慘情帶子洪郎；二，典型的住家男人豬腸粉，語氣陰柔，百分百男師奶。總之，不是走投無路，就是自甘墮落。
我見到的兩位，以上兩者皆非，一個大大聲說「湊仔好快樂！」另一個說「孩子當我是天王！」滿足感無限大。
都21世紀了，住家男人應該換上更Cyber的名字——OverOver，各單位注意，他們是效率最強、容量特大、操作俐落的FTP（FullTimePapa）！
記者：劉嘉蕙
攝影：劉永發、部份圖片由受訪者提供
編號FTP001：Matthew
年資：兩年半
麗港城有隻「袋鼠仔」
Matthew手頭上有兩個Case：大仔Michael兩歲半、細仔Jason16個月，行動代號是「MichaelJ神」。做天皇巨星背後的男人，上街難免矚目，家住中產屋苑麗港城，區內湊細路的，通常是外傭或老人，男人被視作稀有動物，「附近所有人都認得我同兩個仔，仲叫我『袋鼠仔』。」記者跟他接大仔放學，搭一轉電梯，要打幾個招呼；路過一個婆婆，Matthew說得出她幾歲。
他每朝帶兩個仔去買新鮮生果，拖一個抱一個，雙手已經唔得閒，還要答埋好奇路人的提問：「第一句一定問『今日係咪放假？』我答我唔使返工，跟住佢哋接住問『點解媽咪返工你喺度？』我答我在家投資，佢哋就會轉而問我攞冧巴。」他做投資基金銷售經理出身，四年前辭工、結婚、還出書教人《劈炮吾撈》，做個瀟灑的SOHO族，沒想過之後會轉型成全職爸爸。
「結婚時老婆不想生孩子，她覺得要內外兼顧太辛苦。後來我見有些舊同事，結婚幾年無小朋友，返到屋企好苦悶。我想，反正我不用上班，有時間在家，就勸老婆生一個試試看，我負責湊。」注意，不是「幫手」，是「負責」，要孭飛的。加入成為FTP，孩子就是生活重心，他變成每朝六點起床，「BB醒咗，焗住全家醒晒。」睜開眼就要準備孩子點心，「想煲粥仔，就要一起身浸定米。」股市波動，他沒空惋惜，因為客廳廚房可能有一堆家居意外等他處理。
他憶述近年的低潮，是細仔出世、老婆放完產假首日上班，剛巧家中洗衣機故障，他獨自在家中對住兩個仔、一堆污糟衫，惆悵得打給老婆：可唔可以請病假？「所以家庭主婦的苦況我好明白，湊小朋友一日咁多高低起伏，點都會煩，見到老公想呻但老公又未必想聽，真係好慘。」
男人湊仔贏在夠絕
但男女畢竟有別──女人是感性動物，附帶產後抑鬱，湊仔時特別容易情緒波動。Matthew說，男人湊仔比較實事求是，像採訪中途小朋友倒瀉西瓜汁，他二話不說清理現場，「男人傾向先解決問題，女人可能會抦咗個仔先。」他觀察，女人湊仔傾向百般呵護；小朋友扭計，花時間、罵、勸，搞到自己心都煩，「男人做得較絕，佢扭計，我擺佢喺度，不會被影響到。」
一家四口，家務繁瑣又困身，他想辦法簡化程序：一搬屋，立即添置洗衣乾衣機，科技能解決的問題，讓科技解決：「女人未必會咁諗，佢哋會諗，乾唔乾得晒㗎？好唔好㗎？其實臨瞓前㩒個掣咪得囉，第二朝乜都乾！真係慳好多時間，幾貴都要買。做全職爸爸，目的是多陪家人，無理由俾家務霸晒時間。第二個角度看，有效率地料理好家務，等老婆返屋企舒舒服服，也是錫老婆的表現。生第二個仔係老婆主動話想要。」Matthew說。由「唔想生」到「想追仔」，無疑是太太對這全職爸爸的曲線肯定。
「做全職爸爸，要盡快畀所有人知你有呢個決定。我的經驗是，早日宣佈，會得到好多支持及諒解；你唔講，反而人哋會質疑。此外，自我形象要正面，不要覺得湊仔無出息、自己『靠女人』，自我價值低，也會影響到小朋友。」他看過一篇訪問，李安拍《臥虎藏龍》前有六年時間躲在家中湊女，後來電影成功，人人問他那六年是否沉潛博反彈，李安答得坦然──他只是湊女，沒想其他。「這個故事告訴我，今日湊仔，不代表以後一世係咁。現在盡情享受湊仔之樂吧，未來會不會彈到更高更遠，天曉得！」
Matthew湊仔日程
06:00 小朋友起床，全家食早餐
06:45 媽媽上班、小朋友開始搗亂、爸爸做家務
08:00 去超市買餸
09:15 開市，在私人交易所睇市炒期指，小朋友自己玩
10:00 收市，準備午餐
11:00 小朋友食午飯
12:00 大仔上校車、細仔睡午覺
13:00-15:00 爸爸私人時間
16:00-17:00 接大仔放學、媽媽下班回家，一起準備晚餐
20:00 小朋友睡覺
20:00後 爸爸媽媽檢討當日行動細節，計劃翌日行動
編號FTP002：Franklen
年資：四年
遊行當親子活動
女人愛分享，很自然就會圍埋講湊仔經。全職爸爸界不流行三五成群，在網上論壇也成不了氣候。做全職爸爸四年的Franklen想鼓勵父親育兒，特地開Blog《原續父職》寫文章。做過政策研究員的他，寫的都是很紮實的題材，討論社會應該如何支援育兒工作、反思傳統性別角色，不像一般媽媽開的Blog，講吓尿片哪裏抵買或張貼BB肉照。
假日，一般父母帶小朋友去公園、商場，Franklen帶一對子女去遊行、反自駕遊、爭取乾淨空氣，通通有份，「社會習慣分隔大人小朋友活動，食飯分開食；其實小朋友都好想參與大人世界，都想保衞地球。我帶仔女去六四集會，他們不會覺得悶，反而好興奮，爭住點蠟燭。」
老婆支持最重要
Franklen說，「全職爸爸」不是性別角色調轉、「男主內、女主外」咁簡單，深層次的看，是兩性如何分擔家庭角色，促進家庭和諧。
「傳統中國人家庭，媽媽湊仔，爸爸放工後全不過問。如果爸爸留在家湊仔，會被覺得無出息。其實女人也不是生來就懂得做照顧工作，調轉可能有爸爸渴望湊仔。我關注的，是破解性別定型，令兩性都能自在地做自己想做的事，同時得到社會及身邊人的支持。我們的政府不重視育兒工作，但我想講，好多偉人都係媽媽湊出嚟。育兒工作對社會好有貢獻，政府應該給予更多支援及肯定。」
全職爸爸的關鍵，來自爸爸的決心，還有媽媽的支持，「有些男人因為失業才留在家湊細路，老實講我擔心，湊細路不是你坐梳化睇電視飲啤酒，由得小朋友自己玩，那些人要諗清楚自己是否真的喜歡湊；另外媽媽也有責任，很多男人自細不做家務，初初湊仔難免姐手姐腳，如果女人睇唔過眼抱住『你都係唔識，我幫你做埋』的心態，男人會唔開心。」
Franklen'sBlog《ContinuumFathering原續父職》
網址： http://continuum-fathering.blogspot.hk/