瞓少了，大家反應恐怕都慢咗，幸好足球是刺激腦筋急轉彎的事情，所以呢排捱更抵夜之後，球迷們個樣可能殘了，但隨時醒目咗，講嘢都叻啲。
譬如巴洛迪利單刀突然收油係點解呢？當我們凡人胡思亂想、指天罵地時，意大利教頭說出實情：「佢話諗住畀波卡斯辛奴。」有機會建功時還掛住隊友，可見巴洛迪利其實唔算自大，我們誤會了。
又有荷蘭名宿批評荷蘭輸波後，尹佩斯在草地掛住講電話：「輸波後應該檢討，邊有心情講電話？我認為教練應該教訓吓尹佩斯！」呢位名宿有所不知，皆因阿仙奴正安排緊7月的香港之行，咁尹佩斯心急想知道行程都可以原諒嘅。
跟住輪到拿斯尼，對英格蘭入波後放隻手指響嘴上面，向球迷大叫「ShutyourFace」，英倫球迷怒極想話開火之際，教練白蘭斯又撲出來滅火：「我唔知佢嗌邊個，我唔理得咁多。」沉默未必就是金，不過有時頭大咗、講多咗又係冇乜益處，拿斯尼賽後自爆，個入波係專登「陰」曼城隊友赫特：「佢好熟我路，仲知道我習慣射門前會拉弓，所以我決定細動作啲射近柱，搞掂！」入波後叫人收聲，但自己就鬼咁多嘢講，連射門秘技都穿埋，益晒下一隊個龍門啦。
艾拉亦加把嘴，話英格蘭踢法非常車路士，一味退縮只求無過：「好似車仔咁死守巴塞！」嘩，艾拉又識揀喎，自命巴塞唔係拜仁，咁英格蘭今屆話到明，寧願好食都唔要好睇，有自知之明又冇錯喎，橫掂家陣英格蘭都冇乜靚仔咯。
相比起賽前訪問的大路「行」嘢，電視台應該考慮播多啲賽後訪問啦。
文：keyman
now節目主持