未睇D組賽事，但心目中已經出現了心水決賽戲碼，是為西班牙再遇意大利；不是甚麼感情因素，純粹是想encore，好波不妨一睇再睇也。
西班牙一貫地好，在穩守突擊永遠有市場時，紅牛兵團第一時間小組推進的悅目攻勢，簡直就是濁世中清泉。它的好睇，就如你光顧了一間好味食店，恨不得要介紹給所有朋友一樣；若果你有朋友準備第一次睇波的話，請務必給他/她西班牙，不要揀錯希臘。
意大利，終於重拾巴治奧及迪比亞路以往的星味，雖然今番兩位古靈精怪的前鋒組合其貌不揚，但娛樂性卻可能是各隊之冠。卡斯辛奴瘋、巴洛迪利狂，一高一矮，應該火花十足；再加上外貌十足美劇《Heroes》主角的迪拿達利，３人低調地提供了意大利見關過關的火力。
《心戰》中，陳豪表演魔術要靠道具，我們行家提供各項大小預測，也要靠道具，是為數據及往績也。各位觀眾，歷史在重現，唔到你唔相信。96年決賽德國對捷克，是兩隊在分組賽之後的再遇上；8年後的04年，葡萄牙在決賽又輸畀希臘，也是兩隊在分組賽後狹路再逢；嗱，咁今年係2012年，又咁蹺係8年之後嘞，會唔會再有兩支球隊，響同一組攜手出線，之後一齊入決賽呢？似層層呢，但斷估都應該唔會係波蘭同希臘啩……
我呢位吹水名家，仲有預感一位仁兄會行運行到腳指尾㖭；費托家陣未有態啫，浪射多幾場，決賽就上力啦。
keyman
now節目主持