如果德國國家隊教練路維唔教波，轉行嚟香港拍戲嘅話，我求大俠敢保證，李健仁一定冇得撈！咪睇路維生得靚靚仔仔，同埋執得四四正正，估唔到佢有廁紙唔用，鍾意徒手撩鼻屎；你話嘞，搵佢扮成日喺戲入面撩鼻屎嘅如花，肯定做得好過李健仁啦。
又撩又食技術無敵
喺芸芸國家隊教頭之中，德國嘅路維算係幾靚仔，五官端正，身形又keep得好，而且打扮都相當入時；弊在佢有個超唔好嘅習慣，就係喺比賽期間成日撩鼻屎。講真，撩鼻屎呢個行為，本身經已好核突同好嘔心，路維仲要撩完之後食埋粒鼻屎，真係OMG！而佢嘅動作仲要超純熟，猶記得喺南非世盃，佢就右手撩完交左手，再送入口，直頭好似奧斯爾插完幾下花再起腳射門咁暢順。
路維咁鍾意撩鼻屎，醒目嘅攝影師喺前晚德國贏葡萄牙1:0場歐國盃分組賽，梗係到佢實啦。攝影師就影到佢坐喺後備席嘅時候，用右手狂撩個鼻哥窿，之後仲疑似係送埋入口；除此之外，路維企喺場邊亦俾人影到撩鼻屎，但唔知係咪舊鼻屎黐得好實，我求大俠見佢用隻左手食指，出盡力係咁撩，真係幾嘔心㗎！
高美斯無端遭「毒手」
之後德國前鋒馬里奧高美斯喺80分鐘被換走嘅時候，路維上前同佢擁抱，仲用嗰隻採過礦嘅左手，摸落高美斯右邊面度；高美斯無端白事要同路維分甘同味，認真慘呀！不過，聽奧地利肺科專家比斯寧加（FriedrichBischinger）話，食鼻屎嘅人本身好快樂，因為佢哋身心都好和諧：「喺醫學上，食鼻屎係完全符合自然之道嘅行為；事關鼻屎係天然嘅藥物，有抗體和防腐劑。」
我求大俠唔清楚路維係咪信食鼻屎有益身體，但點到好，話晒佢係德國國家隊教練，真係要留意吓自己啲壞習慣喇；家陣一而再、再而三咁斷正喺電視鏡頭前，畀啲小球迷睇到，你話幾咁肉酸呢！