花旗為集團成立200周年搞咗份特刊，請嚟唔少出身花旗嘅名人大班講吓「那些年」。好似前財爺梁錦松，就係1973年花旗聘用嘅第一批本地大學生，佢憶述，花旗當時係行內少林寺，會高頻率調職嚟培訓尖子。佢受惠於每兩年就被調去管理各地唔同嘅銀行業務，唔使廿年就已升到做香港花旗集團第一位華人行長嘞。
另一個同樣由見習生做到花旗香港區行長嘅猛人係陳子政，佢話27年花旗生涯印象最深刻嘅，係03年被急調去台灣坐鎮，當時只係考慮咗兩日就上機。仲為咗改變普通話「好普通」嘅困難，日夜苦練，結果升晒呢，可以喺今日同內地聯繫時遊刃有餘。
而曾經兩入兩出花旗嘅「紅籌之父」梁伯韜就自爆，01年做花旗環球金融亞太區主席嗰陣，極力主張將「萬國寶通」嘅中文名改成「花旗銀行」，統一兩岸三地名稱，最後得咗。