經常講「龍頭企業」，喺中國消費市場10%至20%市佔率已經稱得上做一哥，但竟然有公司，聲稱自己做嘅係「零競爭」獨市生意，市佔率百分百，呢間公司叫神冠（829），專做腸衣。09年上市以來盈利每年升30%至80%，增長高到嚇人。
唔少芬佬朋友都問過海迪，呢間嘢堅唔堅㗎？事關造腸衣呢門生意實在太專門，連分析員都搵唔到可靠行業數據，又無對手比較，單睇神冠經營數字，毛利率62%，經營EBITDA溢利率59%，純利率46%！每年擴產幾多，生意就幾乎升幾多，可以話係供不應求，你造得出就大把人爭住買。
即使舊年雙匯、雨潤（1068）呢啲大客仔相繼出事，影響生意，神冠都仍然係咁「神奇」，2011年營業額升30%。Toogoodtobetrue，海迪希望只係自己想太多。
投資者最鍾意問，既然造腸衣咁好賺，點會冇人加入競爭？神冠話造腸衣技術高、門檻亦高，冇咩人會冒險進入呢個市場。聽分析員講，全球腸衣生產排Top3嘅西班牙企業Viscofan，已經開始喺蘇州建廠，2013年建成，目標係攻佔中國15%至20%市佔率。
海迪翻查年報，Viscofan舊年做6.7億歐元生意，規模是神冠三倍，但人哋EBITDA溢利率只係28%，只及神冠一半。合唔合理？讀者自行判斷啦。
海迪