千億新抱徐子淇前晚到中環出席皮具品牌周年晚宴，她謂一家人會出埠慶祝父親節。談到女兒，子淇表示五歲的大女晞彤性格男仔頭，十足tomboy，不愛扮公主反而喜歡玩警察、蜘蛛俠等卡通人物，她坦言女兒年紀還小，不會擔心，反而最怕兒子喜歡玩女仔玩具。
千億新抱徐子淇前晚一身黑色高衩閃片裙出席皮具品牌MCM中環旗艦店周年晚宴，品牌更慷慨捐出75萬元予子淇一直支持的智行基金會，幫助內地愛滋孤雛，名模琦琦、廖碧兒的前男友兼李澤楷表弟林忠豪、汪圓圓和黃偉文等也有出席派對。
唔捨得離開仔女
育有兩女一子的子淇，表示一家會出埠慶祝父親節，她說：「今晚就出發，會去一個禮拜，去到先諗點樣慶祝，今次會同埋父母一齊旅行，之後父母會帶仔女返嚟，我同老公二人世界。最初老公想我同佢兩個去，但我唔捨得仔女，先至咁安排。」
問到可會將名牌手袋傳給女兒？子淇說：「以前有咁諗，但我大女比較tomboy，英雄啲，細女見到都學家姐，之前大女生日，佢話想要警察、Spiderman同Batman公仔，買裙畀佢又話鍾意褲，想買比堅尼佢着，佢就要潛水衣，之前穿咗有囡囡名嘅手鏈畀佢哋，都唔鍾意。」可會擔心女兒變成tomboy？她說：「我寧願佢咁，都唔想佢性感，家啲女仔12、13歲着啲裙好短，太性感。」
林忠豪有新對象
子淇表示因女兒喜歡警察和消防員，而帶她參觀消防局，她說：「小朋友太細性格未定。」子淇反而擔心幼子俊熹，她說：「如果囝囝鍾意女仔嘢就擔心，我通常畀車仔佢玩。」
此外，問林忠豪落選港姐劉思希早前幫他的公司派傳單，他否認劉思希是其女友，卻自爆最近有新目標：「進展得幾好，對方唔係圈中人。」問他是否被廖碧兒嚇怕？他說：「唔係，不過可免則免。」但他表示兩人仍是朋友。
採訪：林嘉慈攝影：黃偉雄
