一年前，黎堅惠在玻利維亞天空之鏡，彷彿照出一個不一樣的自己，出書寫靈修寫生活，再不只有時尚。
一年後的今日，她毅然在工作中抽身，近來忽爾低調，在傳媒界近乎沒甚動靜，專欄不寫了，電視節目也停了。她說要開拓時裝以外的生活，暫且放下時尚達人的身份，尋求新啟發和生命的平衡。時間看似停止，其實，正急速轉動。
撰文：唐飛輪
攝影：陳盛臣
Wardrobe:COS、RichardNicoll
生命的演進
早前，Winifred決定將電視節目和專欄全部停掉，探索新生活、準備去非洲旅行、又要將時間留給兒子，「時間越來越唔見使，因為生活越來越豐富，想做嘅嘢太多，要在隨心和計劃中找平衡。家我係轉變嘅階段，想用另一種方式生活，想寫新嘅題材。」（所謂以前，也所謂家，生活有啥不同？）「好大分別！以前是Doing，一味做做做，家想試Being，BeMyself，拎走晒專欄、Deadline、電視節目呢啲身份，剩番嘅我係咩嚟呢？我的Essence，我想感受一下。」暫擱下時裝人的身份，她視為自然演進，「時裝永遠都係我的一部份，但比重越來越細。我都做咗咁耐，見到潮流返嚟時你會諗：嘩！廿年前我已經經歷咗一次喇，係咪要經歷咁多次Cycle呢？」
愛錶多面貌
年紀漸長，漸漸對珠寶鐘錶生情。對於名錶，啟蒙者原來是爸爸，「12歲開始拎爸爸啲錶嚟戴，仲係一隻崩咗嘅白金錶，唔係我整爛㗎！之後佢就畀咗我戴，嗰隻就係我嘅第一隻名錶。雖然係唔啱戴，但由嗰一刻就對Timepiece有咗啟蒙。」芸芸名錶中，Winifred尤其欣賞Jaeger-LeCoultre積家錶，「佢核心業務真係造錶芯，係對錶的Machinery精工的追求，唔止得外殼咁簡單。佢有全世界最細嘅錶芯，而且唔係一個錶芯放晒落所有嘅錶度，唔同Size嘅錶會配唔同厚薄嘅機芯，呢樣嘢唔係咁常見，所以我幾欣賞，同埋佢做到錶可以Flip嚟Flip去，呢樣又係科技同工藝嘅結晶，好似係一件ArtPiece，其實又係一個Technology。我鍾意啲嘢好Crystallized，即係話唔止一面，而係將好多優點集合喺一隻好細嘅錶度，好精細。」
錶的意義
名錶對女人的象徵意義是甚麼？或許是男人對女伴的山盟海誓，Winifred話今時唔同往日，「以前可能是家傳之寶，或者男人送畀你。家，女人鍾意買乜就買乜，好記得當年科網期，簽咗一張對我嚟講好大嘅合約，七位數，嘩好開心！即刻唔返屋企，走去中環，走去錶舖，買隻靚錶同自己賀一賀。唔需要由情人或丈夫去成全！」對於她，錶的功能在於襯衫和保值，「用嚟襯衫，着晚禮服時錶就好似珠寶嘅一部份。若是保值，就要睇獨特性。」揀錶當然是以設計行先，「對機械無乜研究，陀飛輪、隻錶點樣揭開……呢啲古仔我都鍾意聽，機械是Design的一部份，亦是創新的一部份。」近年隨着年紀與口味之改變，亦漸漸欣賞鑽錶，「以前覺得鑲鑽好炫耀好庸俗，我鍾意啲有氣質嘅嘢。但近年錶商將平衡拿捏得好好，鑲鑽增值亦可以保持錶嘅氣質和優雅度，唔會覺得戴鑽石錶就係『嘩！暴發戶』！」
Jaeger-LeCoultre（23148633）
尖沙嘴海港城港威商場G219號舖