鄭伊健和蒙嘉慧拍拖7年，近日傳出兩人明年1月結婚。前晚伊健和蔡卓妍（阿Sa）出席新戲宣傳活動，曾離婚的阿Sa對再婚感到怕怕，至於伊健則不自覺露口風表示世界末日前必定結婚，似是暗指年尾時，若屬實真是可喜可賀。
相隔10年鄭伊健和蔡卓妍（阿Sa）再合作主演新戲《我老公唔生性》，前晚在灣仔打邊爐宣傳，同場還有趙碩之和倪晨曦等。
今年10月生日後即45歲的伊健，近日有傳跟拍拖7年的40歲女友蒙嘉慧，鐵定於明年1月結婚，追問伊健時他起初例牌否認：「唔係，成日講住邊有驚喜。」之前他曾表示有計劃結婚，伊健否認改口，問是否借婚訊為8月紅館個唱做宣傳？伊健亦否認，他說：「我係有諗過結婚，但唔會成日提住，我真係冇壓力。」
主力籌備個唱
問伊健有否被催婚，他不慎露口風自爆：「總之係人生大事，唔會唔結婚，大概喺世界末日前。」莫非是指傳聞中世界末日的今年12月21日前？伊健聞言即封嘴說：「唔係呀，得㗎喇，我家要籌備演唱會，唔知點講，又唔想講大話，呢啲係私人事，決定咗先算。」伊健強調不會秘密結婚後才公佈喜訊。至於舊愛梁詠琪送上祝福，伊健笑言不是真的結婚，待成事才恭喜也未遲。
揀禮物贈千嬅
至於跟鄭中基離婚的阿Sa似乎對再婚有點怕怕，她坦言：「啱啱先咩（離婚），家又咩（再婚），太快，真係未諗住。」阿Sa表示已在微博恭賀楊千嬅生BB，有時間希望可以選購合適禮物送給她。
採訪：魯萍 攝影：黃偉雄