上屆歐國盃盟主西班牙喺前晚登場，但表現認真麻麻，僅僅逼和意大利1:1，完全未能展現狂牛本色。場波唔掂唔緊要，場外夠精采咪得囉，其中狂牛龍門卡斯拿斯嘅主播女友莎拉一出現，即刻搞㷫個場；但狂牛中堅碧基嘅歌星女友Shakira就唔多掂，驟眼睇十足十《未來戰士》第一集嘅女主角LindaHamilton咁。
莎拉勁show事業線
西班牙前晚唔知搞乜，攻守都好唔掂，如果唔係龍門卡斯拿斯有幾吓神救，分分鐘連一分都保唔住；卡斯拿斯咁sharp，身為佢女友嘅莎拉，梗唔可以令佢冇面。本身個樣都索嘅莎拉，前晚以女主播身份入場做嘢，順便精神上支持男友；佢一出場，我求大俠真係睇到眼都唔肯眨；雖則佢着咗件米色鬆身西裝褸，但入面件衫個領大到冇朋友，將佢條事業線表露無遺，加上個妝又化得好靚，真係索到爆。
仲記得喺前年南非世盃，卡斯拿斯同莎拉嗰吓世紀kiss震撼全球，唔知喺今屆歐國盃決賽周，佢哋兩個會唔會表演多一次畀全世界球迷睇呢？
Shakira面目浮腫
卡斯拿斯女友莎拉艷壓全場，但係碧基嘅另一半Shakira就嚇窒全場。Shakira一向係拉丁歌后，歌精舞勁之餘，有樣有身材；但前晚佢雖然都化行妝，但係塊面就唔知點解好浮腫，得罪講句就即係樣衰，唔講真係認唔出佢就係國際知名巨星。
話時話，唔知碧基係咪見自己女友咁唔掂，心情受到影響，搞到喺場上表現得失失慌；西班牙嚟緊星期四會對愛爾蘭，睇怕碧基都要叫Shakira執靚個樣先好入場喇。
