歌神張學友當年接拍柯受良（小黑）執導的《咖喱辣椒》而成為好友，甚少睇首映的學友前晚以一身街坊look現身力撐亡友小黑的兒子柯有倫作品《陣頭》，加上曾答允小黑照顧其兒子的曾志偉三日前急call友人力挺，令柯有倫感動得匿埋落淚，可見娛樂圈亦有情有義。
由柯有倫和台灣男星黃鴻升（小鬼）主演的台灣片《陣頭》前晚在九龍灣舉行首映禮，曾志偉、張學友、周家蔚、湯盈盈及苗僑偉一家三口等捧場，現場有過百圍觀者。
冇得見華仔龍女
由於柯有倫的已故父親柯受良在圈中人緣甚廣，張學友當年和小黑合作《咖喱辣椒》，兩人成為好友，所以前晚學友罕有地現身首映禮，認真畀面。一身街坊look的學友頭上束了一小扎頭髮，學友透露與柯有倫的妹妹柯有珍稔熟，與她的老公更是網球波友。至於是否已見過劉德華的愛女時，學友說：「上網先知佢滿月，邊到有得見？你哋都見唔到。」記者指他是天王級數時，他即笑言是過氣天王。
與小黑老友鬼鬼的志偉自爆三日前已周圍call朋友出席首映，他說：「小黑走時，我應承咗會照顧佢，今次係佢第一次做男主角，套戲係台灣又收得，佢好乖。」對於前妻王美華（寶媽）與年輕12年的乾兒子相戀，志偉表示：「個女問我覺得點，我話幾好，咁嘅年紀都有小朋友鍾意，係好事。」
父親保佑票房佳
得到不少世叔伯支持的柯有倫前晚一度感動得在現場偷偷落淚，他接受訪問時直言終於做到令爸爸驕傲的事：「爸爸離開咗八年，拍呢部戲好似同爸爸講嘢，套戲台灣收三億，係爸爸保佑，媽咪都鬆咗口氣。」
採訪：譚倩宜
攝影：陳俊強