蒙牛（2319）終於兌現今年年初嘅承諾，甩底兩次之後，呢幾日帶華華去佢哋內蒙古總部探牛牛。去到同蒙牛合作嘅牧場參觀，華華先至發現今時今日，原來做牛係好過做人，成千隻牛牛就hea喺個泥地上面曬太陽，有部機器專門幫佢哋痕，到入牛場擠奶，仲要播放蒙古草原金曲畀牛牛欣賞。管理層話呢啲叫「動物福利」，做牛做到咁，華華真係未聽過。
舊年重返香港市場
舊年12月起，蒙牛正式回歸香港市場（08年因為毒奶事件撤離），家喺全港650間超市都有得賣。負責香港區銷售嘅總經理溫風亮同華華講，原本佢都擔心香港消費者會唔會仲係對中國牛奶冇信心，但家睇嚟，銷情好過佢哋預期，每個月都升緊。
蒙牛當年離開香港前，係常溫奶市場連續四年嘅冧巴溫，勁過澳洲保利。溫總話，照家個勢嚟睇，要重奪呢個一哥地位，只係「時間問題」，有信心會做到咁話。