大台今屆直播4場歐國盃，繼續玩大堆頭製作；既搵球圈中人，又安排藝人做嘉賓，仲有阿叻陳伯祥（圖）同鍾志光等做主持。我求大俠就覺得節目幾熱鬧，不過，嘉賓估波就做咗明燈喇。上周五揭幕戰，佢哋幾乎清一色撐波蘭小勝，點知和波；前晚又係全世界捧荷蘭，當中阿叻更加大大聲話荷蘭實炒丹麥，點知就係丹麥爆冷贏波。搞到向來鍾意認叻嘅叻哥都認衰，賽後苦笑話群眾智慧原來未必係啱嘅。大台嚟緊周五又播瑞典對英格蘭，球迷記住賽前睇吓佢哋大圍捧邊隊，相信可以搵到啲啟示。