舊年A股打回原形，有網友選出金句「你全家都炒股㗎？」作為去年最毒嘅問候語，但總有人打破呢個宿命，湖南長沙有一家四口炒股當返工，老竇人稱「長沙畢菲持」、化名「張祥」，五年資產升七倍，佢個仔都唔弱，資產增值六倍。
原來張祥間公司05年執笠，當時50歲嘅佢轉為全職炒股，06至07年間，炒奧運概念股王府井，股價由6蚊（人民幣．下同）升到54蚊，賺咗過百萬，之後全家人日日去證券行「返工」。不過佢都試過買隻股票由7蚊升到40蚊，原本賺90萬，高位唔放，最後蝕3萬離場。
張祥話：「股市總是吃不完的虧，上不完的當，後不完的悔。」戰勝關鍵係每次都設假想敵（莊家），施以不同策略，掌握盤口語言，呢方面毛澤東嘅軍事思想最派用場。個仔炒股初期日日金睛火眼實啲大盤，先煉成呢個謀生必殺技咁話。