謝霆鋒與張栢芝離婚後各自各精采，上周五，霆鋒偕母親和妹妹食日本菜，栢芝則帶Quintus到太古城冒險樂園耍樂。不過，有網民大爆栢芝同行友人發現有家長拍攝栢芝，竟以強力電筒照射他人眼睛，結果惹來其他家長鬧爆明星是否大晒。
有網民蘇花sogood上周五晚在親子王國以「明星大晒呀？」為題鬧爆張栢芝，指當日與女兒到太古城冒險樂園玩遊戲時，突然被強光射住，令到雙眼不適。網民其後發現原來是張栢芝身邊友人以強力電筒照射網民身邊一位女家長，當時該名女家長與兒子正在玩彩虹遊戲，見到栢芝與細仔Quintus也正在玩，於是欲拍攝栢芝照片，但栢芝同行友人不欲該家長拍照，於是以強力電筒照射家長眼睛，結果令到家長及身邊人眼睛不適。
「明星大晒咩」
網民不滿栢芝友人所作所為，直斥：「有冇離譜啲呀！以為自己係明星大晒咩？」大批家長紛紛加入討論，有人認為應該通知保安投訴栢芝影響其他顧客，也有家長直斥栢芝教壞細路，甚至有人謂：「咁巴閉咪自己開間囉，一係包場先玩囉。」記者昨致電栢芝經理人稻草人了解，但未獲回覆。
霆鋒拉姑開餐
另外，上周五晚謝霆鋒亦有出動，與母親拉姑、妹妹婷婷及鬍鬚Kong到大坑鮨辰日本料理開餐食晚飯敍天倫。兄妹二人一見面不停打牙骹，又拿着手機交換睇相和拍照，認真忙碌。而拉姑與鬍鬚Kong則一味狂擦，胃口甚佳。霆鋒與拉姑等擦足兩小時才離開，拉姑將一本由霆鋒做封面的雜誌交給霆鋒，又親送霆鋒和婷婷上車，堪稱廿四孝媽咪。
採訪、攝影：梁繼光、朱志聰