蘋機會：DC仔靚四倍　大眼扮單反

內置相機功能的手機質素越來越好，又可即時分享相片，輕巧型相機自然要變革才留得住用家。最近SONY推出一部細機身、大感光片的RX100，擁有輕巧身段的機身，同時畫質可媲美單反，細機都可以影得好Pro㗎！

記者：許福合
攝影：林栢鈞
Model：Wing@PureModels

1吋大CMOS

好多人包括今日靚女模特兒Wing，都係常用手機影相。Wing：「主要係方便，同埋手機質素唔差！」之所以有如此印象，最大原因係現時輕巧型相機，大部份感光片只如指甲般細，感光片面積直接影響相質，如細DC常見的1/2.3或1/1.7吋CMOS，與手機比較優勢自然少咗！SONY這部新RX100絕對可在細機稱王，因為使用罕有的1吋2,020萬像素ExmorCMOS，比起1/2.3吋感光片足足大四倍，細緻度提升四倍，拍攝時可捕捉更多光線，直接減低雜訊。
試拍時由尖沙嘴TheOne19樓影過對面K11，再剪裁出一張737×505相片，起碼放大兩倍先開始見到狗牙，足見大感光片的威力，畫質絕對拍得住單反！

■使用1吋大CMOS感光片，比起傳統DC仔，面積大四倍。

■配合特大CMOS，鏡頭口徑亦比一般DC仔大。

F1.8大光圈

用上大CMOS感光片外，RX100亦配搭大口徑蔡司Vario-SonnarT*靚鏡頭，難得是機身仍保持輕細，放落褲袋手袋都得。這支蔡司鏡除咗係質素保證外，更具備有F1.8大光圈。立即試拍淺景深相片，鬆朦效果自然滑淨，靠得住！不過靚女Wing就認為「自動人像構圖」最實用，相機會跟據人像姿勢，自動剪裁出黃金分割的靚構圖，即使側面拍攝都無阻礙，相當實用！除此之外，RX100仲有幾個吸引賣點，如全解像度每秒10張連拍、123萬像3吋屏幕等，而創意效果更可應用在拍片上，玩落更有趣味。