內地突然減息，原本令市場振奮，但港股上周五卻反高潮下跌，罪魁禍首必數內銀股，普遍跌幅3%至5%，皆因人行減息同時，首次容許內地銀行存款利率可按官方牌價上浮1.1倍，令內銀可上調存款息搶客，市場擔心此舉會令內銀息差收窄，影響盈利，有大行亦即時調低今年盈利預測。
其實有不少專家早已提出，由於內地政策變數多，加上似乎不再傾斜於大型銀行，作為散戶心頭好的內銀股，吸引力不可同日而語，同時被視為最大的春江鴨──社保基金數月前的減持行動，其實亦已暗示唔睇好此板塊，社保基金上周再次出手減持，短期內內銀股應該都難有運行，即使大市回升，此板塊相信都唔會係主力，反之有機會是限制指數升幅的負累。
至於大市方面，西班牙政府宣佈已向歐盟申請援助以重組銀行業，歐元區亦承諾向西班牙提供1000億歐元的援助，雖然唔知之後會否像希臘般有無窮無盡的手尾跟，但總算暫時掃除一個不明朗因素，外圍如美股亦已連升3日，港股現時則可睇實兩個位，若盤中突破18752，反彈應可持續，若跌穿18309，則有機會再試低位，宜先行降低持倉水平。
張士佳
寶來證券（香港）資產管理部董事
本欄逢周一、三刊出