陳冠希（Edison）跟過氣情敵麥浚龍（Juno）不但是潮人一族，連揀女朋友的眼光原來亦相當接近。Juno07年跟Edison舊愛鍾欣桐（阿嬌）相戀後，昨日凌晨竟輪到Edison偕Juno的模特兒舊愛戴庚玲到尖沙嘴睇戲。戴庚玲發現記者時不停左閃右避，Edison則極度躁火，二人如此避忌，認真耐人尋味。
自08年淫照風暴爆發後，麥浚龍對女友鍾欣桐一直不離不棄，甚至在公開活動中怒斥拍攝淫照的陳冠希是渣滓中的渣滓，可惜阿嬌之後接受《志雲飯局》訪問時，自爆最愛的人是Edison，結果令Juno死心分手。Juno與阿嬌甩拖後戀上中英混血模特兒戴庚玲（Janine），二人拍拖9個月後，去年終又分手收場。昨日凌晨，本報記者竟發現Edison與Janine睇午夜場。
拍拖睇《異形》前傳
昨日凌晨12時許，Edison與着住粉紅透視裝的Janine及大班男女友人，到尖沙嘴iSQUAREIMAX戲院欣賞3D版《異形》前傳《普羅米修斯》（Prometheus），一行10多人在開場後才入座，排排坐在I行，Edison則孖住Janine坐在中間位置。
Edison與Janine等人於凌晨2時30分散場離開，記者指Edison如此有興致睇戲，但他卻語帶不屑說：「你咁有興致嚟搵我呀？」繼而拍手又豎起手指說：「Thankyou！」問他會否睇歐國盃？他又再不屑說：「一齊睇啦，請埋你一齊睇！」至於同行的Janine一發現記者拍照即急急彈開，Edison見記者追住Janine拍照，遂向Janine說：「It'snothingwrongwithus！（我們沒有錯）」Janine聞言笑笑口低頭不語。
記者採訪期間，Edison其中幾名友人不停反拍記者並爆粗，Edison之後表現有點失控，走上前「哄」住記者攝錄機鏡頭，表現極度挑釁。
失控爆粗踩記者腳
Edison甚至踩住記者的腳及爆粗罵記者，如此狂躁，難免令人聯想到他是想在Janine面前扮威風充當護花英雄。
其實Juno與Janine甩拖後，拍攝電影《保衛戰隊之出動喇！朋友！》時只跟Edison過氣緋聞女友鄧麗欣（Stephy）傳出緋聞，感情生活可謂dry到爆。相反Edison卻多采多姿得多，他去年與女友楊永睛（Vincy）甩拖後，先後搭上女版NelNel謝芷蕙（Cammi），又與黃榕及內地新人吳思凡傳緋聞，Edison昨日凌晨更偕Juno舊愛Janine結伴睇戲，想不到Edison與Juno揀女友的眼光竟是如此接近。
現年30歲的Janine是中英混血兒，能說一口流利廣東話，母親是英國人，父親是元朗原居民，但在她小時候父母已分開，Janine除做模特兒，也是英文補習老師。她與Juno於08年合作《寫得太多》MV認識，至前年6月相戀，惜拍拖9個月終分手。
而Edison昨日凌晨與Janine睇戲前，曾與父親及胞姊陳見飛等與母親食飯慶祝60歲大壽，陳見飛將一家人合照放上微博。
採訪、攝影：黃文成、彭琮然
癡男怨女關係複雜
陳冠希、麥浚龍在時裝界鬥生鬥死，但二人除潮流品味一致，揀女口味也一致，二人同樣跟鍾欣桐、鄧麗欣撻着，方力申亦與兩女傳拍拖，關係錯綜複雜。
