財爺曾俊華喺新一屆政府有得留任，近排除咗外訪都有留港蒲吓頭，學未來主子咁落吓區。佢噚日喺網誌話，早幾日去咗中環灣仔繞道工程地盤，但唔係要視察進度，只係去關心吓地盤工人嘅福利設施。睇番網誌啲相，鬍鬚曾着晒反光衣又請食tea咁，枱上面仲有「肥彭」至愛泰昌蛋撻，鬍鬚曾果然識念舊嘅香港人。
高糖高熱量 不宜多吃
鬍鬚曾咁辛苦走去塵土飛揚嘅工地，天時暑熱仲住反光衣，戴埋頂帽就成個BobtheBuilder咁款，誠意滿分！佢話見到工地設施非常之唔錯，有洗手間、沖凉房、儲物櫃、洗衣機、乾衣處等設備，仲搭建咗有蓋運動場、有蓋休息處，康樂室又有飛鏢、康樂棋呢啲遊戲設施，下午茶供應埋凉茶！雖然未必比得上Google美國總部咁好玩，但都叫做好過唔少大公司啦。
望真啲張相，原來鬍鬚曾仲同一班工人食泰昌蛋撻同沙翁做茶點，當堂勾起唔少香港人嘅集體回憶，皆因諗起泰昌，相信唔少港人會好似華華咁，諗起末代港督彭定康。政治嘢華華唔係好識，不過都想提吓財爺，09年9月先試過突然心臟病發入院，仲要做通波仔手術，蛋撻呀沙翁呀呢啲高糖高熱量嘅嘢，咪食咁多啦！
李華華
mailto:[email protected]