應屆候選港姐將於本月12日起程到英國拍外景，正當眾候選佳麗準備起行之際，前日本報記者發現，現年26歲5鍾麗與男友外遊泰國，在酒店內鴛鴦出浴照在網上出現，昨日無綫安排鍾麗會見傳媒，為此事解畫，表現淡定的她坦言已為選舉打定輸數，力撐男友只是不小心，更不會為此而分手。
昨日應屆候選16位香港小姐在電視城拍官方照片，5號鍾麗在外事部副總監曾醒明的陪同下會見傳媒，鍾麗承認相中男士是她拍拖數年的男友，照片是數年前去泰國華欣旅行，當時是在放鬆的情況下拍照，自稱保守的她說：「嗰陣我冇諗住要參選，所以覺得唔係好性感同裸露嘅事，直到我決定參加選美後，已經刪除晒啲相，唔知點解仲有一張相喺我男友個facebook度，樂小姐朝早開會都有話我，問我點解會有呢啲相，呢件事對我有好大影響，我同父母都覺得好唔開心，我男友比我更加唔開心。」言談間，未見鍾麗有任何情緒起伏，表現淡定，更坦言未有被人出賣的感覺。
要求刪相
問鍾麗會否再有更激的相片？她說：「嗰個旅程嘅相係類似差唔多尺度，其他嘅旅程印象中係冇。」問到男友是否有自拍癮？她說：「佢係比較怕醜，只係鍾意影自己個樣同貪玩，所以嗰時咪影張咁嘅相，我事後先知佢影相，當時我有叫佢刪除張相，亦覺得唔應該擺出嚟，我有反對過，但係我尊重佢決定。」她力撐男友只是不小心而並非刻意所為，並說：「佢已經好自責、唔開心，我冇怪佢，其實佢係圈外人，佢唔會意識到點樣保護我，或者我今晚再問多次佢仲有冇其他相。」
對於男友被批評某部份比較細，鍾麗說：「呢啲咁私人嘢，唔需要介意人哋點睇。」至於會否被要求退選？她說：「暫時未有，擔心一定有，我打定輸數，公司點安排咪照做，我唔會嬲佢，我唔係好驚佢，大家相敬如賓。我行到呢步好成功，就算係咪因為呢件事而退出，我都學咗好多。」曾生則表示會與其他委員深入了解才作決定。
採訪：何慧斯
攝影：陳順禎
若讀者知道這班入圍佳麗的底細，歡迎電郵至mailto:[email protected]報料。
