嚟到E3直擊尾聲，今日就睇埋各個Game廠王牌大亂鬥。Capcom最具聲勢係《Biohazard6》，試玩場地佈置到成間鬼屋咁，我射殺喪屍時硬係背脊「凉浸浸」，玩一陣已暗標冷汗；另一邊Konami有雷電壓場，《MGR：R》讓機迷一嘗斬殺快感。一槍一劍，睇嚟我今年戾氣會好重。
記者、攝影：韓繼聰
《BH6》贏盡氣氛
Capcom將年尾發售超大作《Biohazard6》，加足料佈置同宣傳，如員工扮死剩種的人大派「NoHopeLife」傳單、攤位又設弔唁區扮紀念失蹤及死者，試玩區更佈置到鬼屋一樣咁有氣氛。明知係Game館，但見到符咒、溪錢等中式佈置，總覺陰風陣陣、氣氛嚇人！隻Game操作大致跟第五集相若，但可選三位角色進行遊戲。試玩時除感到畫面氣氛營造極出色，大量摸不透黑暗死位，令人不寒而慄外，仲有新嘅近戰格鬥技巧，玩落都幾刺激。
另一大作《DMC》都唔弱，試玩區似Disco，仲有辣妹跳住鋼管舞陪你試Game，好鬼馬喎！之前少年但丁「食白粉」造型曝光，廠方被Fans鬧到癲，最終從善如流，將主角改番似個人。今集武器有大刀、鎖鏈及鐮刀，遊戲表現依舊爽快，而且睇到少年但丁同樣酷愛耍帥招式，Chok到爆，呢啲咪三歲定八十囉。
《MGR：R》血腥分屍
可算係萬眾期待嘅Konami出品《MGR：R》，齋睇宣傳片，敵人無一個可留全屍，已經感受到主角雷電嘅極端暴力。真正試玩，遊戲速度感極強，揮劍時鍾意一刀斬開敵人兩半又得，狂搖Analog喪斬幾十「碌」亦得，血腥程度令人咋舌，但就越斬越有癮，突然覺得自己有啲變態。
而Ubisoft大作《刺客教條3》則在家用及手提機雙線出擊，家用版就新增了極具視覺震撼的海戰模式。試玩後感到有相當難度，海上的風急雨勁令船隻難以控制，仲要兼顧避開敵人攻擊，真實感高但好難玩。
《DeadorAlive5》
相隔七年，「搖乳格鬥」一眾女角依然美艷動人。
《LittleBigPlanet》
首度登陸PSV，憑住主機多樣化機能，相信過關同收集Item會更刁鑽。
