無知與智慧之間其實真係差少少，早幾年有首歌真係聽到人喊得出，那首歌名叫《邊一個發明了返工》，歌者是組合MyLittleAirport，一個表明看似太無聊的問題，認真啲又真係幾有啟發性，尤其是喺呢排的體育旺季，又NBA季後賽、法網又打到final、EURO又打鑼打鼓，淨係睇波一日廿四小時都唔夠用啦，仲要返工？邊得閒呀！
返工令唔少人明白了甚麼是無聊，而體育運動呢，好明顯就係那些年有些人覺得有點無聊之下所發明的，各種各類的運動項目之出現，自然同不同地方不同文代不同取向，以至不同氣候有關係；譬如籃球註定不是香港人可以諗得出的，皆因我們的樓底沒有加拿大人的咁高；而乒乓球也不會是歐洲人那杯茶，有邊個會鍾意駝住背來做運動呢？
眼見EURO開幕戰一場水兵鬥海軍都為坊間球迷們製造大量話題，不得不佩服盤古初開的足球運動創作人。無論係古代的中國抑或現代的英國，蹴鞠同soccer之出現原本係理所當然，人隻腳生出來就係鍾意踢踢貢，唔踢波見到汽水罐都會大腳一兜；而女士都不遑多讓，不知幾多少女最愛在沙灘踢浪花。有關足球之發明，我最想問的一個無知問題，係邊鬼個識得設計一場賽事上半場45分鐘、下半場45分鐘，而加埋中場休息15分鐘，以及些少補時，一場波永遠都係差不多兩個鐘頭的事！我就唔信制定比賽時間嗰位仁兄係無心插柳，設計背後可能有一大堆理論支持。一個人坐定定可以頂幾耐呢，就係兩個鐘，你撳去電影台，每套戲都多多少少就係兩粒鐘，呢個黃金120分鐘定律，係足球抄電影，定電影抄足球就確實不得而知。
唔使做街訪，都可以肯定大眾愛睇波多過返工，皆因睇波滿足咗人的3大基本需要，是為食、色與性。食，邊個睇波唔食到成隻豬咁，今屆EURO的節目有壽司贊助，講波佬終於可以邊食邊講；色者，養眼也，世界波好睇，但還是廣東台好嘢，搵三點式女郎講波，確保直播有好波睇。
至於性者，當然係人性啦，是忠是奸是正是邪，球場乜都齊，當然大家對性的幻想從來無遠弗屆，難怪今屆終於有避孕套贊助的射門統計，因為目標觀眾係晒度！
文：keyman