社長L夫婦去沙田睇畢加索名畫，覺得好似入咗沙田街市，大感無癮，話他日如有文化局，做局長嗰位，剩係管博物館已經有排頭痛，振英哥想害邊位女士或先生，最好叫佢做文化局長，呢位局長日後必然飽受攻擊，如豬八戒照鏡，內外不是人。
大編輯嘅親戚係藝術家，熟悉畢加索畫作，好似係下個星期在沙田香港文化博物館主持一場公開演講，介紹畢加索畫作，相信有不少人往聽講，至於有幾多人聽得入耳兼明白，咁就要到時先至知，希望臨場唔會聽到嬰兒啼哭不停之聲啦！
講起嬰兒啼哭，現時啲較年輕父母，似乎完全唔會驚住影響別人。肥仔K過年前在工展會及年宵主持一個攤位賣收音機，辛苦異常，某一晚在攤位前人羣之中，突然見到一位長者，相貌依稀記得，於是衝口而出：「你係唔係以前沙田馬會銀袋嗰位經理？」長者為之愕然，答曰：「係呀，退休好耐咯，點解你會記得我？」
肥仔K話梗係記得啦，細佬哥之時在銀袋飲茶，食餐，俾呢位經理鬧得多吖嗎！其實就唔係用口鬧嘅，只不過呢位經理「執法甚嚴」，每見嬰兒啼哭，就語氣堅決咁請媽咪捧BB出去lobby，見有小頑童在餐廳內周圍走或大聲嗌，就會叫佢地父母注意，不要騷擾他人，肥仔K就係有時懶理父母警告，畀呢位經理捉過幾次，所以肥仔K後來大個仔之後，入到任何會所，都識得不要高聲談話，不要亂跑亂動，起碼識得若干禮貌。
現在呢，會所內不時有嬰兒啼哭，兒童大聲講，大聲笑，經理不敢上前阻止，除非另有會員主動投訴，否則嘅話，經理若主動勸止，隨時會俾父母鬧番轉頭。廿一世紀第二個十年咯，全世界都少咗好多規矩，立法會議員可以穿着無領T恤開會，龍應台部長可以着波鞋到台灣立法院見立法委員，甚麼都隨便輕鬆好多，不是1953年伊利沙白女皇登基嗰陣咁多禮儀，但係咯喎，年青父母如果有孩萬事足，懶理世俗常規嘅話，他日孩子受寵壞，辛苦嘅咪又係自己！