首日賽事「冷味」甚濃，波蘭只踢了半場好波，原以為幾有霸氣，最後能和波有啲好彩；俄羅斯上屆首仗慘吞西班牙4:1，今次重演歷史，不過係以同樣比數大勝真係似老退嘅捷克，好sharp醒喎。首日勝或敗也無謂強記，繼續用首輪賽事做功課；早視克羅地亞為今屆黑馬，今戰老狐狸、舊電池嘅愛爾蘭，最緊要能忍，熱W退熱照捧。
今屆初步睇好法國之餘，對C組嘅克羅地亞，亦抱有較大期望。俄羅斯有舊電池艾沙維校炮，初戰亮麗且看仲能走多遠；克軍有俾曼聯睇起嘅10號鎖匙人莫迪歷喺中場傳射，為國為己勢會借今屆賽事自抬身價。這支東歐兵加埋7號同11號，中場戰力估計比俄更強；對掛帥嘅英超上季「下半場」最大發現嘅謝拉域破門好有期望。學佢哋少帥比歷講，呢位9號仔會係克軍今屆最大資產；由格流過檔火速喺英超撈得掂，唔嘢少。小弟早押小注佢做神射手，希望今場已有交收。
愛爾蘭由老查掌帥，成班舊電池基雲、奧沙、李察鄧尼、杜夫同羅比堅尼仲係骨幹，肯定想同希臘一樣，穩守突擊博懵；希望克兵能忍，勿學波蘭先急攻，由謝拉域效愛華頓做重心嘅突擊踢法，一腳夠收死對方鋼門基雲。
世界在變，足球勢力也會如是。不變卻係本地了無新意嘅電視製作，免費公仔廂廿年如一日，又係分兩組人，賽前「柴娃娃」一番，「阿叔」在天上看見也會發笑；「現在」仲搞嘢，強植入食壽司環節，又有廿年前嘅《叻人新世紀》組合做嘉賓主持，其實多加靚女主持sell美腿，對普羅男球迷，更有賣點。
文：蘋果波神
今日心水
熱：克羅地亞勝
冷：[首名入球]謝拉域