期待已久的歐洲國家盃，上星期五晚正式開波，我也良久沒試過在深夜時分與觀眾見面。由於今次盛事乃四年一度，所以尤其重視，有明星球迷李克勤坐鎮之外，梁榮忠和Keyman更組成歡喜寃家搞氣氛，就連觀星台CEO都踩過界，不過當然有我們一班專業足球評述員講波啦！
第一日的準備功夫特別多，我傍晚6點已經開始化妝，然後陪大家睇足兩埸直至凌晨5點。漫漫長夜，揭幕戰波蘭對希臘又以為悶波一埸，我都有一邊睇波一邊在微博與球迷進行牙骹戰。首先我猜中揭幕戰握手言和1:1，但怎也猜不到雙方各一紅、波蘭門將被逐、希臘12碼不入，過程認真峯迴路轉。因為我猜中奇情的1:1之後，很多球迷也留言，更挑戰我猜第2場俄羅斯對捷克。可是我只能說肯定俄羅斯會贏，卻很難說他們贏多少球。
事實上，俄羅斯陣容沿用大部份上屆2008歐國盃人腳，豐富的經驗是一大優勢。亦相信一眾球員心態是只許成功不許失敗，不竟有可能是他們最後一次參與此大賽。不過由於平均年紀都不輕，活力、體力未必夠，又反而贏到4:1。今晚又輪到我陪大家欣賞C組兩場賽事，頭場西班牙對意大利，我捧西班牙最有冠軍相。儘管未曾有球隊成功衞冕過，不過依然希望鬥牛勇士打響頭炮。加上外圍賽8戰全勝，火力十足，而意大利則受假波醜聞困擾，今場西班牙應可贏兩球或以上。
文：依雯