氣管敏感的吳雨霏（Kary），從小就喜歡狗，但狗毛是敏感症大敵，所以家人一直反對她養寵物，她長大後經深思熟慮，下定決心做個負責任的主人，六年前在寵物店選購了雄性、奶黃色的拉布拉多犬，改名Dash。Kary踢爆Dash最怕行雷：「聽到行雷，佢乘機跳上我張床，要我陪住佢瞓。」
撰文：胡比
人與人之間相遇要講緣份，人與狗亦然，吳雨霏憶述當年在寵物店，原本看中一隻雪橇犬，可惜牠是雌性的，機會就落在雄性的奶黃色拉布拉多犬Dash身上，Kary說：「爸爸話屋企陰氣太重，媽媽、我同妹妹，太多女仔，如果要養狗，就要揀男仔，咁我當然尊重屋企人意見，所以就揀咗Dash。」從此Dash加入他們這一家，成為重要的一員。
全家總動員照顧
首次養狗，Kary用雞手鴨腳、狼狽不堪來形容，由餵牠吃食物、在哪裏大小便、洗澡、散步及病倒看醫生，種種的第一次，都教Kary難以忘懷，她笑言：「真係好大責任，仲有睇醫生真係好貴。」不過見到Dash健康成長，再多的狼狽Kary也覺值得，而且自從Dash成為家中一員後，令原本關係已很親密的家人，再拉緊一點。
Kary說：「以前都多時間可以自己照顧佢，但近年因為工作，成日都唔喺屋企，好多時都係屋企人幫手照顧，好多時屋企人會講番Dash做咗啲乜嘢，有啲乜嘢事發生，多咗個共同話題，咁Dash都得我哋好開心。」
男友要愛屋及烏
別看Dash大大隻隻，Kary踢爆牠其實很細膽，最怕行雷，Kary忍不住取笑說：「佢細膽到死，一聽到行雷，即匿入我間房，仲乘機跳上我張床，之後就唔願走，要我陪住佢瞓。」早前經常行雷，嚇到Dash晚晚走去搵Kary陪瞓，雖然她氣管敏感，但見Dash一副楚楚可憐的樣子，又怎會捨得踢牠落床。
六歲的Dash還未做絕育手術，Kary也想幫牠找個伴，但又怕未能應付多一隻狗，她說：「始終都係第一隻養嘅狗，就梗係錫到佢燶，但我又想佢延續下一代，如果佢有乜嘢事，都仲有佢啲仔女，但係真係唔敢諗呢個問題，佢家健健康康，唔想諗住。」Kary表示找男朋友，條件之一就是要喜歡狗，因為鍾意動物的人，大多有愛心，她笑言：「如果唔鍾意狗，我都會令到佢鍾意，而且我覺得男仔拖住隻大狗出街，特別有型同吸引。」
聽教聽話抗誘惑
Kary自言沒有好好教導Dash，在她眼中愛犬是頑皮狗，拍照當日，鬆了狗繩的Dash確實表現興奮，不時在公園跑來跑去，但當Kary指令牠時，都有乖乖聽話，一些基本動作，如坐低、趴低和畀手，全部順利完成。
最愛零食
Kary將零食放在地上利誘Dash，沒有指令，Dash只會定眼望着零食，不敢亂動；當示意可以吃時，地上的零食瞬間消失，Dash嗒得津津有味，流露滿足的表情，全因拉布拉多容易訓練，屬服從性高的犬隻，對主人忠實，非常活潑好動，還有大無畏的性格，不少拉布拉多犬都能成為狗醫生，Kary大可考慮讓Dash接受狗醫生訓練，讓頑皮的Dash變得定性，又可以幫人。
