蔡少芬（Ada）近排喺內地發展好掂，一部《甄嬛傳》令佢每集片酬由10萬加到20萬，前日佢去咗松江萬達廣場出席活動，跟住要返橫店拍《金枝慾孽貳》，問到會唔會掛住個女？Ada話：「老公會好好照顧個女，不時傳相畀我，我仲會每晚同囡囡視像對話，佢好曳㗎，性格好男仔頭，似足我，哈哈。」
帶楚兒搭高鐵
Ada講起囡囡就眉飛色舞，原來佢前日靜雞雞帶埋囡囡去松江，Ada仲好鬼馬，喺微博啲相度幫囡囡整容，畫咗對大眼、有貓鬚嘅大花面，仲寫住：「今天感謝萬達廣場的邀請，我和女兒都很美吧！」俾Ada嘅前度緋聞男友王祖藍笑佢：「你的女兒竟然有這樣的媽媽！」但睇真啲張相，見楚兒挨喺媽媽胸前，而Ada就貼住囡囡額頭，兩母女好溫馨。Ada噚日又帶楚兒搭高鐵：「今天我第一次坐高鐵，也是湯圓（楚兒）的第一次，感覺不錯，只是，別在有很多行李的時候去坐，相信感覺會更好的。」