最近阿叔有個吉盤想放，於是早前搵咗幾間地產代理幫手推銷。呢個單位有兩道門，一道木門、一道鐵閘，為咗方便大家，於是只係替木門配咗幾條鎖匙，而鐵閘就亦無落「塔鎖」，諗住一間舖一條鎖匙就算，反正屋內已經空無一物，唔使驚被人爆格，又諗住環保啲。
誰知呀，日防夜防，衰「A準」難防。其中一間地產舖，為免個盤被其他行家捷足先登，竟然擅自加裝「塔鎖」，即係得佢哋有鎖匙，無形中就隔絕其他人帶客睇樓，等如獨家放盤。
大哥，你無嘢呀？你唔係以為其他人唔會向業主投訴啩？阿叔好快就獲悉事件，但根本唔知係邊間所為，況且家家有求，無謂搞到唔愉快，惟有拆走個「塔鎖」，自己另外裝過，再派鎖匙畀各代理。
我都知家生意難做，有客都唔夠盤，若然呢個放盤好快被人承接，真係過海神仙，「好彩」家個市非常牛皮，唔係郁得好「行」，故好易拆穿，但業主就條氣唔順，亦無代理會自認用過呢啲旁門左道，根本好難追究，惟有吞咗啖氣。
呢行蠱惑嘢好多，但積非成是，連客仔都麻木晒，真係香江怪現象。
讀者善叔
本欄園地公開，歡迎各界來信，以450字為限，請電郵至mailto:[email protected]，
註明《家》樓民講場，請留聯絡電話。編輯保留文章的刪減權。