環觀今年E3三大廠，就只得任天堂有新機WiiU睇，畫面提升唔係最大賣點，最過癮係塊平板控制器，可以扮忍者放手裏劍，玩到現場班鬼仔「Wii」嘩鬼叫，我都玩到出晒汗，不禁講句ILove「U」！
記者、攝影：韓繼聰
新控制器變化多端
講足全年嘅WiiU，今年E3終於正式登場，攤位都放滿機座畀人試玩，而從現場試玩遊戲之多，相信WiiU完成度接近100%，只可惜仍未公怖開賣詳情。
可算任天堂精神領袖嘅孖寶兄弟，新作都有得試玩，我當然唔會放過呢款《NewSuperMarioBros.U》。實地試玩過，可見遊戲畫面提升不少，亦加入新的變身，以及朋友可以喺隔籬幫你手射敵人、起階磚，不停頂龜食金幣，那些年的煲Game日子着實令人懷念。其實WiiU今次係以《NintendoLand》做主打，玩法係拿手嘅小遊戲，其中最受歡迎係扮忍者放飛鏢，將平板控制器放喺掌心，另一隻手就放「手裏劍」，現場中見試玩人群將平板舞嚟舞去，埸面又熱鬧又搞笑。
獨立芒變出新玩法
《Batman:ArkhamCityArmoredEdition》
要用體感遙控蝙蝠飛鏢，平板畫面顯示飛鏢主觀鏡頭，操控上幾考功夫。
微軟Xbox360
《Halo4》齋睇無得玩
機迷等《Halo4》等咗好耐，今年見到Xbox鋪天蓋地的宣傳，Banner、大海報、合照等，點知去到攤位，得個巨型《Halo4》佈景，同一架型爆戰車，偏偏試玩機座就一部都無！望住宣傳片，見到畫面精細咗好多，亦公佈喺11月6日推出，算係有啲安慰。
反而《Forza：Horizon》以開放式賽道作賣點，揸住靚車想去邊都得，更首次加入夜間賽事，引嚟唔少人排隊玩。另一邊展館就發現《龍珠Kinect》有得試玩，雖只得兩部機，但同樣令人興奮。遊戲中出龜波，瞬間轉移、連環格拳、魔閃光等，跟足原著姿勢就可以出招，個個玩到好興奮，我都忍唔住排隊玩多兩鋪，當正自己係悟空！
