【記者鄧志盈報道】年輕人走在時代尖端，一群設計系學生突破傳統對死亡的恐懼，用新角度為15位長者度身訂做環保潮壽衣，潮到去街都着得。每件獨特壽衣，標誌着每位長者的精采人生和未完心願。
傳統錦鍛金線壽衣，隆重卻帶呆板。明愛白英奇專業學校設計系學生挑戰難度，重新演繹壽衣，加入環保元素，採用棉、羊毛和絲絨等天然物料，為沉重的衣飾注入生氣。
「之前以為壽衣只係畀死人着，原來係老人家大壽時嘅禮服，寓意健康長壽，即係一件平日都可以着嘅衫！」同學動手設計前做資料搜集的大發現，成為設計靈感的泉源。
度身訂做注入新元素
30名學生兩人一組為一名長者設計壽衣，幾個月來緊密溝通，從長者的喜好、生活習慣等入手採集設計元素。「我哋會問佢哋鍾意乜嘢顏色、退休前嘅工作同經歷，同有冇未完心願」。
年輕時做媽姐的陳雲曉婆婆，一直以把主人服侍得妥妥貼貼引以為傲，她的壽衣以媽姐服作藍本，是一襲平實墨綠色綑棗紅色邊的套裝。
為信佛的78歲吳月華婆婆設計壽衣的Charlie坦言，最感動還是長者對生死的豁達：「吳婆婆認為死亡係人生必經階段，毋須要驚。我幫佢設計咗一套五件嘅壽衣，衣襟同袖口印上梵文，款式隆重好似飲宴禮服，佢好鍾意。」吳婆婆試穿時笑不攏嘴地說：「呢件係我一生人最合心意嘅衫，希望着住佢走完人生路。」
設計系講師陳詩雅表示，新潮環保壽衣所採用的物料，燃燒時不會產生有毒物質，剪裁設計盡量節省布料，適合日常穿着，較傳統壽衣環保，每件成本約2,000元，計劃稍後推出市場。