法國運來畢加索名畫，在沙田嘅香港文化博物館舉行展覽，香港市民與藝術愛好者有眼福咯，請大家欣賞名作之餘，要多謝我地嘅廣大馬迷，包括左丁山在內。點解呀？賽馬與畢加索名作點樣可以扯得上邊？好多文化界人士眼中，賽馬係庸俗玩意，下里巴人，畢加索名畫先至係陽春白雪，精緻文化，馬迷滿身銅臭，與畢加索差天共地啦！
騎騎，文化人勝在把口叻，枝筆勁，弱在辦起大事來，一定搵機構或企業贊助，口袋裏無錢。任何人參加巴黎市區旅遊團，坐旅遊車都會經過畢加索故居，導遊會話俾你聽，當年畢加索無錢交租，每個月是但畫幅畫俾房東當租金㗎咋，至於後來嗰批畫值好多錢，明益房東，係後來之事。呢次香港之有畢加索作品展，要多謝香港馬會慈善基金大力贊助㗎，你估特區政府願意負擔晒咩。
畢架索名氣太大，唔知佢畫乜嘅人都走去沙田捧場，大編輯與太太上星期日去到文物館，買唔到入場券，於是行過城門河對面，實地視察新樓盤「溱岸」。但社長L嘅太太就醒目，一早在網上訂票，故此兩公婆入到場。睇完之後，社長L唔抵得，打電話嚟投訴香港文化博物展覽館實在太過業餘，藝術展覽會變成工展會，場內人多不特已，夾雜兒童叫聲，嬰兒哭聲，參觀人士之高聲大聲，搞到社長夫婦心緒不寧，社長L嘆曰：「莫講話歐洲嘅藝術展覽，我地去過新加坡睇藝術展，人地現場管理妥善，場內秩序井然，參觀人士說話陰聲細氣，不會騷擾他人；沙田文化博物館就弊咯，地方不夠大，人太多，管理員似維園保安多過似博物館管理員，新加坡人慕名嚟香港睇畢加索嘅話，必定掩住嘴笑香港冇文化，我身為香港人，覺得好醜怪！」社長夫婦兩人在此環境下，邊有心情欣賞畢加索藝術，匆匆走了一圈就離開展覽室，點知展覽室隔籬有趙少昂山水畫展，立即閃入去觀賞，唉，文物館管理員好似係在文化中心開音樂會，用擴音器大聲嗌：「畢加索畫展，仲有十五分鐘就入場，請注意！」再加埋啲人群吵鬧聲，嬰兒哭聲，社長L話：「趙少昂如果翻生在現場見到，可能會嬲到死多一次！」