早前烏克蘭有10個球員絞腸痧，當中包括舒夫真高同泰摩斯卓克，後者仲要吊鹽水，搞到對土耳其場友賽輸0:2。經過兩日休息後，教練布洛堅話中招班球員經已冇事，全隊23人下禮拜一鬥瑞典都可以候命。35歲嘅舒夫真高（右）仲話，佢哋好有信心可以旗開得勝。呢位前車路士前鋒話：「對瑞典時，你哋會見到一支煥然一新嘅烏克蘭。」