編輯吩咐這第1篇稿要早一天交功課，這正好給我大個理由不理會時間性，正想不着邊際的隨意發揮時，編輯又傳來深夜短訊：「希望內容可以有些關於電視製作的點滴……」加番個金剛圈給我也好，大話西遊的範圍縮細了，比較不容易離題。
吉祥物同上屆勁似
如果你是特別喜歡公仔的小朋友或女球迷，而又有留意4年前和今屆的吉祥物，你可能會有個錯覺──這4年你是不是白過了！因為今屆的兩隻吉祥物，和4年前款式（圖）竟然差不多，直頭有點國內那些老翻主題公園feel，明明其他配套設計都好得，就係公仔出事，都是兩國合辦惹的禍。也和上屆一樣，兩個小國合辦表面是win-win，但水兵遇海軍大家幫唔到大家；今屆主角仍然係一眾強國，Euro史上唔係無爆冷過，但頻率唔會咁密，8年前的冠軍希臘，今晚揭幕戰應該係負責襯托起波蘭，都望這個悲劇之國，可以威番吓。
4年後另一無變的，係我們睇波的平台，now全程有直播，tvb則全程有精華，可以滿足晒普羅大眾及所有發燒球迷；更進一步的，是今時今日你可以在手機或電腦同步睇直播，我試過在公園一邊陪着女兒打韆鞦，一邊睇波，幾好feel；不過此情此景，Euro期間不會重現，不是女兒特別早瞓，只是公園早就關門了，好在。
文：Keyman
now足球評述員