陳七上月中背女友Toby帶她的好姊妹Emily到時鐘酒店兼當街煲煙，之後陳七事業愛情雙失。不過陳七有計，火速掂Toby，無業的他大前晚送外賣到澳門，即晚帶Toby到五星級星際酒店爆房箍煲。Toby回心轉意早有迹可尋，她上周六在尖沙嘴接受本報專訪時，已力撐陳七好仔兼嫁得過，並表示已原諒他，不排除閃婚做「七嫂」。
願再給機會
模Toby雖被花心陳七連番傷害，陳七早前更帶Toby好姊妹Emily爆房，但Toby對男友始終未死心，願再給予機會。大前晚陳七就被本報拍得與Toby在澳門爆房兼箍煲，對此Toby昨在電話中甜笑且大方回應說：「我哋係復合，多謝大家關心，其實上個月件事之後，我哋一直有聯絡，但我唔肯見佢（陳七），佢知我去澳門做嘢，突然過嚟箍煲，真係驚喜又感動。」
陳七與Toby一復合即在澳門來個溫馨爆房夜，Toby說：「佢同我講咗好多嘢，承諾以後唔會再犯，亦唔會再聯絡嗰啲人（Emily），再搵佢直情同自殺冇分別。佢仲答應嚟緊會好好工作。」
畀男友98分
Toby表示與男友在房中共對有尷尬時刻，幸好大家坦誠面對解決問題，漫漫長夜，他們不只傾偈，Toby說：「我哋都係做情侶做嘅嘢，好正常，我唔會唔認。」問Toby可怕被朋友取笑冇「吉士」？愛情至上的她說：「男友係我揀，我唔會後悔！」
Toby上周六接受本報專訪，談到陳七偷食便落淚，但仍很維護男友：「我有眼睇，拍拖時佢好照顧我同我嘅家人，佢冇100分都有98分。爆房事件令我好難受，但有邊個冇錯過？我會畀機會佢。牛唔飲水唔㩒得牛頭低，但明顯佢係俾處心積累嘅人跣入局。」
Toby和陳七拍拖年多，已視男友為結婚對象：「我哋好夾，大家好鍾意家庭生活，唔排除叮一聲我接受番佢，叮一聲佢向我求婚，我會答應。」採訪：比華利
攝影：陳志嵐
場地：Grappa'sKimberley