呢排人氣話題，除咗滬綜指乍現六四玄機，以及Cheap曾之外，當然離唔開正在公開發售嘅iBond。唐牛本來都諗住抽埋一份，不過越來越多迹象顯示，iBond短炒長揸皆不宜，唔抽好過抽。
先講短炒，證券行狂推優惠吸客，當中包括十成孖展免息免手續費，仲有埋回贈，條款筍爆，所以今次散戶參與程度，肯定勁過上次，相信分配結果會係人人有份（政府唔想俾人鬧劫貧濟富）。傳統智慧告訴我們，新股越多散戶抽中，首日升幅越唔掂，因沽貨者眾，大戶亦Corner唔到貨，要砌上有難度。
再睇長揸，首批iBond舊年7月推出，當時恒指喺22000點樓上，股友個個認為iBond只有5至6厘息毫無吸引力，結果周地眼鏡碎之餘，大市亦見咗頂；家恒指萬八都危危乎，新一批iBond預計年息只有3.5厘，卻個個爭住搶，相反理論看，個市應離底不遠，留番啲錢買股好過。
唐牛