未開波先出事！烏克蘭諗住借主場之利喺今屆歐國盃大顯身手，點知臨開波發生國家隊球員集體食物中毒事件，總共有10個球員中招！好彩嘅係，烏克蘭喺分組賽守尾門，第一場對瑞典嘅比賽仲有一星期先開波，球員有時間康復。
泰摩斯卓克要吊鹽水
烏克蘭教練布洛堅透露，暫時仲未知班國腳食錯乜嘢搞到食物中毒，當中中場泰摩斯卓克嘅情況，似乎唔係咁樂觀：「家嘅情況絕對唔係講玩！泰摩斯卓克要吊鹽水。我唔知道原因，因為班球員之前各自食唔同嘅嘢。我唔敢講今次集體食物中毒事件，對我哋喺歐國盃爭標會有乜影響，但唯一慶幸嘅係，我哋喺12號先進行第一場比賽，否則隨時連湊夠11個正選球員都搞唔掂。」
烏克蘭喺星期二進行決賽周前最後一場熱身賽，喺德國中立場以0:2輸咗畀土耳其，事實上泰摩斯卓克同前鋒禾路連都已經病到踢唔到呢場波，而老將舒夫真高、中場加馬殊同埋後衞保丹畢高等幾個，都一樣覺得個肚唔妥，但都頂硬上踢埋佢。完咗場波後，烏克蘭大軍已經喺星期三返去基輔，希望佢哋可以盡快養好病啦。
烏克蘭喺06年世界盃有驚喜表現，成功殺入8強，不過之後就一路向下。今次藉主辦國身份，首次出戰歐國盃決賽周，雖然球隊本身實力平平，但仍背負住國民相當大嘅期望；咁大壓力要踢出好成績實在唔樂觀，再加埋今次食物中毒事件，我求大俠都認為烏克蘭前景更加難睇好。
捧盃獎金4,360萬
烏克蘭足總啱啱公佈咗今屆歐國盃獎金詳情，如果捧盃嘅話派發450萬歐元（約4,360萬港元）；而球隊喺決賽周每贏一場就拎50萬歐元，和波都有25萬歐元。不過家半隊波腳軟軟，有幾大本事去拎呢筆錢實在唔樂觀。另外，丹麥足總亦為國家隊開出奪冠獎金條件，如果可以重溫92年「丹麥童話」喺今屆歐國盃奪標，每位球員就可以獲得大約50萬美金（約390萬港元）。