噚日有消息話快將45歲嘅鄭伊健同蒙嘉慧（YoYo）會喺下年1月拉埋天窗。伊健同YoYo拍拖六年幾，遲遲未結果，消息話YoYo好心急做麪嫂，但伊健就吊兒郎當，YoYo惟有行老爺政策，由老人家開聲幫拖，加上伊健啲朋友陸續成家立室生兒育女，終於搞掂伊健，喺下年1月迎娶YoYo。一向低調嘅伊健想一切從簡旅行結婚，但YoYo就想風光出嫁，寧願唔收禮金，都要大排筵席。
同一口徑
馮仁昭噚日打畀YoYo恭喜佢，佢否認話：「係周刊寫嘅，主婚人係嗰本周刊，咁就要問番呢份周刊喇。」之後馮仁昭問伊健，佢同YoYo同一口徑，仲笑晒咁話：「嘻嘻！都幾開心㗎！好多朋友打電話恭喜我，有關婚禮嘅詳細內容，要問番本周刊，我會考慮搵各周刊幫我哋做婚禮籌備，因為我8月就要開演唱會，最近已經開始健身跑步同練歌，真係好忙，所以結婚嘅事就要交畀大家！」問伊健開完演唱會係咪真係結婚？佢又笑笑口咁話：「隔兩個月就寫一寫，大家冇晒驚喜，睇下幾時突然畀驚喜大家啦。」
伊健同舊愛邵美琪拍拖六年幾宣佈分手，之後同梁詠琪嘅戀情又係維持咗六年幾就分手，家同YoYo又到咗六年幾嘅危險期，睇吓今次蒙麪戀會唔會破魔咒啦。