昔日英格蘭足球流氓惡名昭彰，雖然近年惡行唔算多，但至少波蘭警方認為防人之心不可無。英格蘭國家隊選克拉科夫做集訓基地，駐守當地嘅警方嚴陣以待，準備好一系列防暴裝備嚟對付滋事球迷；除咗足以攞你命嘅霰彈槍，仲有「無敵大水炮」、「咬蛋警犬」同埋「聲波手槍」，10大兵器幾乎出齊，問你死未？
英格蘭揀咗克拉科夫一家球會，將佢個訓練場作為集訓基地，亦都會入住當地酒店。雖然今屆歐國盃冇賽事喺克拉科夫上演，但風頭躉英格蘭國家隊住喺呢度，當地警方唔排除跟住嚟嘅英球迷會搞事，實行做定十足準備。
超聲波槍一射即失禁
克拉科夫其實一直以嚟都經常有球迷騷亂，防暴警察周時都要出動處理呢啲嘢。據當地報紙披露，克拉科夫警方已做好準備，我求大俠就帶大家睇睇有乜裝備咁巴閉。
每位警員都會配備霰彈槍，話就話射唔死人，不過俾佢近距離開一槍，其實都會好大鑊。跟住係水炮車，用嚟控制大班搞事球迷就啱晒。除咗呢兩樣嘢之外，警員帶住嘅警犬經過嚴格訓練，一收到指示就會直接攻擊目標人物下體，對住佢哋隨時「爆蛋」。最後仲有高科技超聲波手槍，暴徒被射中後，會即刻失禁，成條褲濕晒咁醜死怪，搞事分子睇怕都會收斂吓。
迪科爾喪父暫回國
波蘭警方搞咁多嘢都係有備無患，當地球迷唔搞事就最好不過。再講，英格蘭3場分組賽都喺烏克蘭踢，距離克拉科夫有一段距離，英球迷有波飛嘅都去烏克蘭喇。另外，英格蘭足總周四發表聲明，透露國家隊前鋒迪科爾嘅爸爸不幸逝世，呢位熱刺前鋒暫時離隊趕返去英格蘭處理喪事，之後再歸隊，帶住傷痛為英格蘭備戰歐國盃。