上嗰月環球出咗隻慶祝香港回歸15周年嘅歌《難忘時刻》，諗住想討好中央，可惜如意算盤打唔響，MV放上YouTube後劣評如潮，俾網民怒插，更有人揶揄首歌應改做《淪陷時刻》。
六四剛完，七一未到，環球呢首《難忘時刻》，由樂隊Mr.作曲，主唱有譚詠麟、李克勤、陳奕迅、Mr.同吳雨霏等。環球話希望歌曲可以引起市民共鳴，MV畫面出現97年回歸典禮，跑馬拉松，習近平訪港同今年行政長官選舉等片段，一味唱好繁榮，有如洗腦式國民教育。
Mr.被鬧冇靈魂
不過網民對MV似乎唔多有共鳴，因為MV自放上YouTube後，引來不少網民怒罵環球擦鞋，網上有20,000多點擊率，但負評接近2,000個，矛頭直指作曲的Mr.，話佢哋為錢冇晒獨立精神，又冇靈魂嘅樂隊；當年參加過《民主歌聲獻中華》嘅譚詠麟同李克勤亦被網民狂插。對於首歌被人狂轟，Mr.透過環球唱片公司發言人話：「首歌係公司安排，我哋好尊重言論自由，只係做好自己本份。」
李克勤噚日獲港台委任「太陽Daddy」，講到《難忘時刻》俾網民鬧爆，克勤話：「我冇睇留言，身為國家公民愛自己國家冇乜唔妥，呢首歌每個人都有唔同睇法，做首歌出發點係好。」
