禾確特未婚妻美蓮妮榮登英格蘭最索WAGs（另一半）！喺網頁WhatsYourPrice.com舉行嘅「你最想同佢拍拖嘅英格蘭WAGs」選舉，23歲嘅佢以52%得票率當選。
禾確特未婚妻最索
喺超過20,000名男人投票中，美蓮妮喺英格蘭大軍23個WAGs中以52%當選，而包尾嘅就係前鋒朗尼嘅老婆高蓮，僅獲5%得票率。而就係因為樣靚身材正，英國《太陽報》仲特登請嚟美蓮妮做英格蘭代表，同另外3支歐國盃熱門球隊荷蘭、法國及西班牙嘅WAGs鬥一番兼接受訪問。喺訪問中，美蓮妮強調唔覺得自己係WAGs，仲坦言由於剛成為物理治療師，為咗工作，佢今屆歐國盃未必會到波蘭及烏克蘭捧場；不過，佢就認為英格蘭一定會喺今屆歐國盃勝出。
英軍WAGs包機撐場
至於荷蘭嘅代表係射手尹佩斯太太布查婭，28歲嘅布查婭則揚言自己一定會喺在今夏到波蘭及烏克蘭捧場；而佢就似乎唔係太睇得起英格蘭，認為荷蘭嘅大敵係德國、葡萄牙及西班牙。同布查婭一樣今夏會親身捧場嘅，仲有西班牙代表中場法比加斯嘅女朋友丹妮娜。丹妮娜雖然已年屆36，但保養得好好，一啲都唔似大法比加斯11年咁多。法國代表後衞基捷基治嘅太太莎蓮，就話雖然今夏歐國盃好重要，但佢唔會親自去捧場；反而會返番法國南部，同一班親戚朋友齊齊為基治打氣。
另外，據報英格蘭嘅其餘WAGs，就打算包機去呢兩個國家，親身同愛郎打氣。