【本報訊】股市好危險？曾自嘲是「冒牌股神」的恒地（012）主席李兆基，昨日又再股神上身，表示「家個市好危險」，自己也是「唔敢買，又唔敢賣」，暫時「守住先」。不過他力推地產股，認為股價與資產值折讓大，將來會「升好多」。 記者：陳健文
已很久沒有發表大市前景看法的李兆基，昨出席煤氣（003）典禮後忍不住再發表對後市看法。他說：「呢3個月個市真係好波動，我都唔敢買，又唔敢賣，都係守住先……外圍情況咁差，真係可大可少，都係睇定啲先。」至於何時適合入市？他說：「家個市好危險，可以等安全啲嗰陣再入市，可以睇定啲先。」
建議朋友買地產股不買樓
若果入市可買哪類企業股份？李兆基建議可買入地產股，因為折讓大，更以一個朋友情況做例子，「有一個朋友問我，佢男朋友畀咗1000萬佢，到底買樓好定係買地產股好，我就話，當然係買地產股啦！」
他說：「受近期經濟問題影響，家喺交易所掛牌嘅地產股，就算資產值有成100蚊，股價都只係得40蚊左右，一半都唔夠，拆骨賣都可以攞番100蚊啦……家個折讓真係太多喇。」
以恒地為例，昨日收報38.7元，每股資產淨值為78.23元，折讓幅度約50%。收報86元的新鴻基地產（016），每股資產淨值119.44元，折讓幅度亦達28%。
作為本地龍頭地產商之一，卻不建議大家買樓，李兆基的解釋是預期樓市升幅跑輸地產股，「1000萬只可以買到普通樓，而普通樓將來嘅供應將會增加，升幅有限，1000萬最多咪升到千幾萬。」
他續稱：「地產股就唔同，家係因為外圍經濟問題，所以地產股先咁平，若果當金融風暴過去，股價返回正常水平，1000萬就可以變成2000萬……若果進取一啲借孖展，變成4000萬亦唔係問題。」
專家：地產股息率4厘值博
時富資產管理董事總經理姚浩然認同李兆基看法。他說：「家好多地產股折讓真係好大，呢個時候買入折讓大地產股，由於有約4厘嘅股息率支撐，下跌風險約莫係一成，但若果個市好番，上升幅度估計有兩成，潛在回報高過喺家買樓。」
不過，香港置業行政總裁李志成卻唱反調，認為供應是較長遠的影響，在目前低息環境、供平過租情況下，買樓投資仍是一項較穩健的投資選擇。利嘉閣總裁廖偉強亦認為，樓價雖難如股票般，短時間內隨時有逾倍升幅，但目前資金依然充裕，樓宇又供不應求，供樓負擔不算太重下，樓市前景仍會樂觀。