美國E3開鑼前，三大主機廠商例牌先搞發佈會，而任天堂搶飲頭啖湯，在名為「NintendoDirect」發佈會上率先Showoff來年大計。除WiiU塊平板控制器在按鍵上稍稍改動，還加入NFC無線通訊外，同場還公佈了WiiUPro手掣，外形上肥下尖，着實頭似Xbox、腳似PS3混合體，靚唔靚就見仁見智，不過宣傳照用上黑色，就跟WiiU相當格格不入了。
硬件未有振奮消息，老任重頭戲反而玩網絡發展，其順應社交網絡潮流而誕生嘅WiiUniverse（簡稱Wiiverse），不但將WiiU玩家聯繫起嚟，更可跨平台Link埋落3DS、手機同電腦，以文字、繪圖甚至視像方式溝通，跟世界各地「Mii角色」交流同分享。最正係將遊戲畫面Capture再掟上網分享，如搶先爆機、隱藏劇情、角色造型等畫面，統統在Wiiverse度Share，讓機迷有個啱Key聚腳點。
