剪頭髮可以轉運？睇嚟唔單止我求大俠相信，連葡萄牙新星基斯坦奴朗拿度（C朗）都信。C朗呢個新髮型幫唔幫到葡萄牙贏到歷嚟首個錦標，家未有答案；但可以肯定嘅係，佢就搶晒風頭，十足十當年英格蘭嘅萬人迷碧咸咁。
葡萄牙大軍喺禮拜一由里斯本啟程去波蘭嘅波茲南踢歐國盃，佢哋喺出發之前，先去總統府同葡萄牙總統席爾瓦見面。喺成班葡兵之中，梗係C朗最搶鏡啦，除咗係因為佢靚仔出名又好波之外，仲關佢個頭事。
見葡國總統露「坑」
查實佢早排都轉咗髮型，喺頭頂左邊鏟咗條坑，但就冇將啲頭髮擸高。見總統咁大件事喎，呢位皇家馬德里前鋒當然要執到個樣靚一靚啦；擸起咗頭頂啲頭髮，而且仲要亂亂哋，一句講晒就係有凌亂美。猶記得碧咸喺02年世盃決賽周剪咗雞冠頭，結果掀起熱潮，搞到好多大人同細路都去剪番個同佢一樣嘅髮型；唔知C朗呢個髮型，可唔可以成為潮流指標呢？
我求大俠深信，對C朗嚟講，掀起熱潮仲係其次，最緊要係可以幫佢轉運。C朗喺03/04球季響朵之後，04年開始代表葡萄牙參加大賽，踢過04年歐國盃、06年世盃、08年歐國盃同埋2010年世盃，但都同冠軍緣慳一面；最近嗰次喺04年，可惜喺決賽輸畀「神話國」希臘0:1而屈居亞軍。
C朗喺同總統先生見面時就話：「大家都已做準備，將會喺比賽博晒老命。」佢仲代表成班球員向總統先生贈送咗一件印有總統個名嘅1號波衫。至於總統席爾瓦則咁講：「全國人民都會支持由保羅賓度執教嘅葡萄牙國家隊。葡萄牙首場比賽係喺今個月10號上演，對手係德國，咁啱嗰日就係葡萄牙嘅國慶日，希望到時會將啲好運帶畀國家隊啦！」
拉莫斯短髮醒神
C朗以新Look戰歐國盃決賽周，佢嘅皇馬隊友沙治奧拉莫斯亦轉咗髮型。呢個西班牙後衞之前長髮飄飄，家陣就剪短晒，落望去雖則冇咁美派，不過就相當醒神。