《那些年》大收，就證明大家對舊事件舊情懷都念念不忘，最好時光倒流可以搵番沈佳宜；皇家馬德里同曼聯，周日就搞咗場元老慈善賽，幫助非洲兒童教育工作，睇番費高、列當度、舒寧咸、高爾再次馳騁球場，等大家回味返呢班「那些年」球星。
皇馬已經連續3次搞元老賽，之前就對過拜仁同AC米蘭，今次就對英超老牌球勁旅曼聯；東道主皇馬陣容當然鼎盛，施丹、費高同卡路士3條煙領軍，仲有瀟灑哥列當度中場派牌，費高一個美妙遠射，收死曼聯門將雲達沙。曼聯亦都有舒寧咸、高爾同艾雲等名將，天才翼鋒沙柏頭槌頂入一球，舒寧咸雖然射失12碼，下半場都單刀挑入，顯示功架，皇馬結果以3:2勝出，全場60,000名球迷盡興。今場波預計籌得400萬歐元（約3,900萬港元）善款，非洲兒童多謝晒你哋！
