一年一度嘅「與股神畢菲特共進午餐」慈善拍賣今日開始喇，今次拍賣一如以往喺eBay上面搞，底價2.5萬美金（約19.4萬港幣），美國時間8號截止，善款主要用嚟幫三藩市慈善基金GLIDE，興建社區診所同提供食物畀窮人。
12年籌1150萬美金
股神呢個午餐拍賣會，今年已經係第13屆，過去12年吸引咗唔少名人參與競投，中國人都有份，好似步步高創辦人段永平、神州「私募教父」趙丹陽都中過標同股神食飯。據統計，12年至今共籌得超過1150萬美金善款。
舊年用咗263萬美金中標嘅係對冲基金經理韋施拿（TedWeschler），之後俾股神羅致，做咗巴郡旗下投資經理，最近美國傳媒仲將佢喻為股神接班人㖭，真係一時佳話。今年個午餐拍賣中標嘅仲可以帶多七個friends去同股神食飯，唔知今年股神會唔會再乘機揀蟀呢？