自從即將退任的孫明揚局長提出以「電子書壓低教科書」價格的政策後，政府將向立法會財委會申請撥款五千萬元作推動電子教科書之用，互聯網界元老莫乃光與黃岳永公開批評撥款，配套不足，學校無錢，學生缺電腦，對電子教育在香港之可行性，大潑冷水。話莫黃兩位係元老，並非指佢地年紀老，而係話佢地係香港互聯網先鋒。一九九五年，左丁山都唔識互聯網係乜東東，莫乃光已在明報工業大廈內一個小單位埋頭苦幹，砌出香港第一代互聯網站hknet，創香港先河。黃岳永就在矽谷工作，九八至九九年間砌出一個互聯網叫做MagicalDesk.com，佢兩位大哥在香港講互聯網，當然係元老級人馬啦，以佢地嘅經驗，都話在目前香港，推動電子教育係得個講字，左丁山信㗎。
教育專欄作家程尚達（星島日報）在五月三十一日講到，教育局欲找大專教授開發電子課本，但學者認為有難度，大學籌組款項與教育局合作，並不容易，而且教授嘅主要職責係教書與研究，並非撰寫中小學教科書，要兩者兼顧，除非有三頭六臂。不過有一位黃錦輝教授（中文大學工程學院副院長）就在「星島」撰文，左一句書商扭曲市場，右一句書商壟斷，但全無界定何謂「扭曲」，何謂「壟斷」，佢指電子學習係新趨勢，可打破書商壟斷；講實務，黃教授不妨與莫乃光、黃岳永討論吓。講教科書市場研究，黃教授顯然未向中大金融系教授王澤基請益，於是寫文並不嚴謹，如果係家長代表乜太物太如此下筆就話啫，黃教授係學者噃，點搞㗎。
真學者講電子教育，不妨申請研究基金研究電子教育諸問題。IHT（五月三十一日）有一長文報導美國加州灣區有實地研究電腦與教育嘅關係，原來研究發現，電腦普遍化，窮家子女有電腦之後，唔係用嚟學習，而係用嚟打機，上網，上fb，搶走學習時間，擴闊一個time-wastinggap，富家子（父母皆有學位者）因家教反而較少在電腦上浪費時間！將來香港推動電子教育，有冇呢個問題呢？唔該啲學者真正研究吓！