胡杏兒、鍾嘉欣、湯盈盈、賈曉晨、麥長青同歐陽震華，噚日喺荃灣宣傳無綫劇集《耀舞長安》，現場幾乎只有杏兒同嘉欣嘅粉絲，兩班粉絲仲起勢鬥嗌鬥大聲，好彩冇損杏兒同嘉欣感情，佢兩個仲攬頭攬頸鬼咁老友，玩遊戲時嘉欣驚企高咗嘅杏兒跌親，好心幫手扶住杏兒㖭！不過杏兒一企高，個大躉就現形。早排去咗橫店拍戲，冇見一排個patpat忽然大咗喎！曾經增肥扮肥田嘅杏兒話：「係呀！喺橫店拍戲一日三餐，生活定時太舒服，肥咗七磅，下身係重災區，自己一向冇pat，突然大咗好唔慣，家要努力減肥，但年過30之後好難減。」
嘉欣自認慳妹
另外，最近有報道話嘉欣姐姐患咗重病，搞到佢要死慳死抵籌醫藥費，嘉欣澄清報道失實，家姐非常健康，不過佢都認自己係慳妹，佢仲話慳家係美德，佢笑笑口話：「應使得使啫，我份人比較實際，連工人都冇請，只係做正常女仔會做嘅事，就係去街市買餸煮飯。」